móvete

MOCIÓN PARA INSTAR Á CONSELLERÍA DE MEDIO AMBIENTE E ORDENACIÓN DO TERRITORIO A GARANTIR AS INDEMNIZACIÓNS QUE CUBRAN A TOTALIDADE DOS DANOS CAUSADOS POLOS XABARÍNS E PREDADORES EN EXPLOTACIÓNS AGRÍCOLAS E IMPLEMENTAR MEDIDAS PARA UN MAIOR CONTROL DESTAS ESPECIES.

De acordo co previsto no Regulamento de Organización, Funcionamento e Réxime Xurídico das Entidades Locais, o Grupo Municipal de Móvete do Concello da Estrada desexa someter á consideración do Pleno a seguinte moción:

EXPOSICIÓN DE MOTIVOS

Cada vez son máis habituais os casos de danos que especies como o xabarín ou o lobo están a causar nas explotacións agrícolas do noso Concello. Os reiterados ataques do lobo son a causa de baixas no gando de moitas explotacións gandeiras, e os destrozos de especies de fauna salvaxe nos cultivos agrícolas son cada vez máis frecuentes.

Os perxuizos sufridos polos propietarios das explotacións non sempre son indemnizados na súa totalidade por parte da administración competente (e cando o son, normalmente con moita demora), afectando directamente ao sector agro-gandeiro, que xa de por sí atópase nun momento crítico.

As cuantías establecidas para facer frente ás indemnizacións por parte da Consellería son insuficientes ante o incremento dos danos causados por estas especies, e a súa convocatoria non sempre permite entregar a solicitude en prazo.

Por todo isto, o Grupo Municipal de Móvete do Concello da Estrada, presenta para a súa consideración e aceptación polo Pleno Municipal os seguintes ACORDOS:

INSTAR Á CONSELLERÍA DE MEDIO AMBIENTE E ORDENACIÓN DO TERRITORIO A:

·         Garantir indemnizacións que cubran a totalidade dos danos causados polos xabaríns e predadores en explotacións agrícolas, así como implementar un maior control destas especies.

·         Profundización e estabilización das estratexias de prevención de danos causados por predadores e xabaríns nas ganderías.

·         Impulso do diálogo entre os actores involucrados.

·         Convocatoria e facilitación das mesas de diálogo intersectoral, como a Mesa do Lobo.

·         Mellora no deseño, axilización e simplificación das indemnizacións.

·         Estudo e impulso da innovación nas estratexias de prevención.

A Estrada, 19 de setembro de 2016

Asdo: A Portavoz do Grupo Municipal de Móvete.

SR. ALCALDE – PRESIDENTE DA CORPORACIÓN MUNICIPAL